- Հոդվածներ
- Կայունություն
- Ընդհանուր կայունություն
Նոր համագործակցության պայմանագիր Էյչ-Էս-Բի-Սի Բանկ Հայաստանի և Վերակառուցման և Զարգացման Եվրոպական Բանկի միջև
Էյչ-Էս-Բի-Սի Բանկ Հայաստանը (այսուհետ՝ Էյչ-Էս-Բի-Սի Հայաստան) և Վերակառուցման և Զարգացման Եվրոպական Բանկը (այսուհետ՝ ՎԶԵԲ) ստորագրեցին Ռիսկի բաշխման շրջանակի (RSF) համաձայնագիր՝ հայաստանյան ընկերությունների համար ֆինանսավորման հասանելիությունն ընդլայնելու նպատակով։ Ֆինանսական հաստատությունների գծով ՎԶԵԲ-ի գործադիր տնօրեն Ֆրենսիս Մալիժի և Էյչ-Էս-Բի-Սի Հայաստանի գլխավոր գործադիր տնօրեն Իրինա Սեյլանյանի կողմից ստորագրած համաձայնագրի շրջանակներում ՎԶԵԲ-ը կհամաֆինանսավորի Էյչ-Էս-Բի-Սի Հայաստանի կողմից իրավասու վարկառուներին տրամադրվող անհատական վարկերը:
«Այս համագործակցությունը ՎԶԵԲ-ի հետ մեր բազմամյա հարաբերությունների նոր փուլի սկիզբն է խորհրդանշում, որի միջոցով ակնկալում ենք շարունակել տեղական բիզնեսների համար ֆինանսավորման հնարավորությունների ընդլայնման գործընթացը», - ասաց Իրինա Սեյլանյանը։
RSF-ը ՎԶԵԲ-ի Փոքր բիզնեսի նախաձեռնության ֆինանսավորման երեք հիմնական մեխանիզմներից մեկն է, ծրագիր, որն ուղղված է տեղական մասնավոր ընկերություններին աջակցելուն և զարգացմանը:
Էյչ-Էս-Բի-Սի Հայաստանը ՎԶԵԲ-ի հիմնական գործընկեր բանկերից մեկն է Հայաստանում, որի համագործակցությունը կենտրոնացած է հատկապես կայուն էներգետիկայի ոլորտում ներդրումների աջակցման վրա: Էյչ-Էս-Բի-Սի Հայաստանը դիրքավորվել է որպես երկրում կորպորատիվ և ներդրումային բանկային ծառայությունների տրամադրման առաջատար:
ՎԶԵԲ-ը բազմակողմ բանկ է, որը նպաստում է մասնավոր հատվածի և ձեռնարկատիրական նախաձեռնությունների զարգացմանը երեք մայրցամաքների 36 տնտեսություններում: Բանկը պատկանում է 71 երկրների, ինչպես նաև ԵՄ-ին և ԵՆԲ-ին: ՎԶԵԲ-ի ներդրումներն ուղղված են իր տարածաշրջաններում տնտեսությունները մրցունակ, ներառական, լավ կառավարվող, «կանաչ», դիմակայուն և ինտեգրված դարձնելուն: Հետևեք մեզ համացանցում, Facebook-ում, LinkedIn-ում, Instagram-ում, X-ում և YouTube-ում։
HSBC Խումբ
HSBC Holdings plc-ն՝ HSBC Խմբի մայր ընկերությունն է,որի գլխամասը գտնվում է Լոնդոնում: Խումբը իր հաճախորդներին ծառայություններ է տրամադրում 62 երկրներում և տարածաշրջաններում։ HSBC-ն հանդիսանում է աշխարհի ամենախոշոր ֆինանսական կառույցներից մեկը, որի ակտիվները 2023թ. սեպտեմբերի 30-ի դրությամբ կազմել են 3,021 միլիարդ ԱՄՆ դոլար:
HSBC Հայաստան
«Էյչ-Էս-Բի-Սի Բանկ Հայաստան» ՓԲԸ-ն հիմնադրվել է 1996թ․-ին։ Բանկը Էյչ-Էս-Բի-Սի Խմբին ամբողջությամբ պատկանող դուստր ընկերություն է։ Էյչ-Էս-Բի-Սի Հայաստանը սպասարկում է շուրջ 30 000 հաճախորդի Երևան քաղաքում գտնվող իր 6 գրասենյակի և մոտ 310 աշխատակցի միջոցով: 2023 թ.-ի սեպտեմբերի 30-ի դրությամբ բանկի ակտիվները կազմել են 334 միլիարդ ՀՀ դրամ` ներառյալ Էյչ-Էս-Բի-Սի Բանկ Փի-Էլ-Սի Լոնդոնի կողմից Բանկի միջնորդությամբ տրամադրված վարկերը: Բանկը վերահսկվում է ՀՀ կենտրոնական բանկի կողմից։
